zoom
Comun di Tavagna

Piazza Indipendenza 1 - 33010 Feletto Umb. - tel: 0432/577311 - 0432/1698911 - fax: 0432/570196

Va ai contignûts. | Spostiti su la navigazion

Imprescj personâls

La Lenghe Furlane, in curt

Informazions gjavadis fûr dal sît dal Ufici pe Lenghe Furlane de Provincie di Udin 

Il furlan al è une lenghe neolatine dal grup ladin. Tant che lenghe si è formât sù par jù ator dal an Mil e al à mantignût, vie pai secui, une origjinalitât particolâr che lu rint, ancjemò vuê, une vore diferent dal talian e di chês altris fevelis cjacaradis tes tieris confinantis (todesc, sloven e venit). Par antîc, in Friûl a jerin a stâ i Carnis, popolazion de çocje celtiche. Tal 181 prin di Crist il Friûl al fo cjapât dai Romans. Daspò de dominazion dai Langobarts e dai Francs, tal 1077 si costituì tant Stât autonom, li che il podê lu veve il Patriarcje di Aquilee parie cuntun Parlament (il Parlament de Patrie dal Friûl). Tal 1420, il Friûl, gjave la Contee di Gurize, al fo concuistât dai Venezians che lu guviernarin, mantignint une cierte forme di autonomie, fin tal 1797, cuant che e le sot dal domini de Austrie, daspò lade al mancul la Serenissime. Tal 1866, il Friûl (gjavade la part orientâl che e deventarà taliane tal 1918) al fo cjapât dentri tal Ream di Italie. I prins documents par furlan a son dai secui XII e XIII, cuant che a comparissin ancje lis primis composizions poetichis. Di in chê volte, la produzion leterarie par furlan e je cressude di un continui, cun risultâts stilistics ancje di nivel alt (Ermes di Colorêt, Catarine Percude, Pier Paolo Pasolini). Cun di plui, tor dal secul XIX, si è svilupade une coinè leterarie codificade di tescj autorevui che ancje in zornade di vuê e rapresente un pont di riferiment impuartant pal procès di normalizazion linguistiche. Il furlan al à a disposizion putrops dizionaris e di tescj di caratar gramaticâl, e al è studiât li des Universitâts di Udin, di Triest, di Praghe, di Mosche e di Lubiane. Fintremai des origjins la Glesie e à doprât cheste lenghe te liturgjie e te dutrine e, cualchi an indaûr, e à viodût di curâ lis traduzions integrâls de Biblie e dal Lezionari. Si fevele par furlan tes provinciis di Gurize, di Pordenon e di Udin de Regjon autonome Friûl-Vignesie Julie, e te provincie di Vignesie (Mandament di Puart).

Chei che a fevelin
A fevelin par furlan sù par jù 600.000-650.000 di lôr, ma lis statistichis plui inzornadis a marcjin un câl preocupant di chei che lu fevelin, soredut jenfri i zovins. Daûr di une ricercje sociolinguistiche dal 2001, il 52,2% dai intervistâts al capìs e al fevele cun regolaritât par furlan, il 20% al capìs ma lu fevele ogni tant, il 19,9% al capìs ma cence cjacarâlu e il 2,6% no lu capìs e no lu fevele.